救救榕樹！5招觀察分辨蟲蟲噬咬痕跡

【明報專訊】長春社噚日喺facebook，話喺有啲地區發現原本四季常綠嘅榕樹，樹冠頂部有被蟲咬食嘅大爆發迹象。原來，上年同今年中，都有一隻名叫燄色榕蛾（學名：Phauda flammans）嘅蛾蟲大口大口咁咬食榕樹嘅樹葉，被咬嘅樹種主要係細葉榕和垂葉榕，最嚴重時蛾蟲會食晒整個樹冠，如果被咬食嘅範圍廣泛，會影響榕樹健康！

環團籲收集數據救樹

環團長春社呼籲大家幫手收集數據，救救榕樹，如果見到有榕樹嘅樹冠密度稀疏，可以留言或電郵話畀佢哋知地點、日期，以及提供相片。

留意樹葉蛾蟲 樹冠有冇稀疏

點樣幫手觀察？佢哋有5個方法：一、遠距離觀察，一棵密度正常嘅細葉榕或垂葉榕，樹冠密麻麻且四季常綠；被咬掉葉嘅榕樹，部分甚至整個樹冠都冇葉，樹冠密度稀疏。二、近距離留意仍然掛喺樹枝上嘅葉片係咪唔完整、被食咗。三、地下嘅落葉係咪唔完整。四、睇睇地下有冇細小嘅球狀粒粒，通常係黑色，呢啲係蛾蟲嘅便便。五、睇吓周圍有冇蛾蟲。