活化石籬街市 重溫徙置大廈風貌 必到打卡位

【明報專訊】香港發展快,以前嘅面貌好多都喺社區中消失,基滙資本「民坊」最近就將位於葵涌石梨貝嘅石籬街市活化,當中加入老香港情懷,如以懷舊綠白色系為主色,仿照徙置大廈走廊營造特色打卡位,並加咗昔日舊招牌及舊巴士站牌裝飾等懷舊裝置,呈現當年徙置大廈風貌。

活化石籬街市 重溫徙置大廈風貌 必到打卡位
石籬街市活化後,街市外亦以舊區為主題,包括有「熱狗」巴士嘅裝置,2樓就有老屋邨家家戶戶晾衫喺門口嘅打卡位。(基滙資本提供)

前身為石籬徙置區嘅石籬邨喺1966年建成,係全港唯一仍保留徙置大廈嘅屋邨,今次街市翻新,但街市內仍保留咗20間舊商戶,包括扎根區內多年、喺南亞社區遠近馳名嘅南亞布藝店、香燭舖、改衣店、五金水電店、茶葉店等。而民坊將會同長春社「糧善關愛坊」合作,喺街市建立食物回收平台,下周起逢星期一、三、五晚上於街市回收食物,派發畀有需要嘅人。另外民坊亦會喺街市推出「原區就業」計劃,優先聘請石籬街坊,希望為當局創造更多就業機會。

活化石籬街市 重溫徙置大廈風貌 必到打卡位
石籬街市活化,街市內亦設有開到凌晨零時嘅美食廣場,入面有十幾間小食店,並設有座位畀人食嘢。(基滙資本提供)