【外遊注意】保險業提醒：旅保一般不保新冠肺炎引致損失
【明報專訊】「日本開關真的很興奮」，雖然回港要隔離7日，不過近期已有港人去外地旅遊。保險業聯會有見及此，就向會員公司收集旅遊保險關於新冠疫情保障嘅最新資料。佢哋提醒旅客，旅遊保險通常將新冠疫情所引起嘅任何損失、費用等，納入除外責任事項，即係一般嚟講，新冠相關損失係無得賠。不過，有部分保險公司，有為符合香港或目的地政府疫苗接種要求嘅旅客，提供新冠疫情相關嘅伸延保障，旅客要受保就要確保自己符合相關規定。
如果旅遊期間感染新冠疫情，保聯話有半數以上保險公司會提供醫療費用保障，包括住院費用；有部分保險公司為確診旅客提供縮短旅程保障。若出發前感染，部分保險公司有提供特定日期內取消旅程嘅保障。
旅遊染疫 逾半保險公司提供醫療費保障
不過如果唔係因為感染新冠疫情，而係受入境限制，例如不符疫苗接種規定等取消行程，或因為航班熔斷需要滯留海外，保聯話一般而言係唔包在旅遊保險嘅指定受保風險，即係唔受保。如果受保人旅遊期間因個別情况要延長保障期，就應該係原有保障期完結前同保險公司申請，公司會考慮收取額外保費嚟延長保障期。因為不同旅遊保險條款有異，保障範圍以保單條款為準，有問題就要問保險公司。
email：piano@mingpao.com
