【網上展覽】浸大視覺藝術畢業展 VR360度有得睇

【明報專訊】浸大視覺藝術院噚日起至8月31號舉行本科畢業展,喺啟德校園展出120名畢業生嘅作品;受疫情影響,啟德校園展覽暫停向公眾開放,院方以虛擬實境360度方式拍攝展覽場地及所有作品,公眾可登入網址http://avabagradshow.hk/vr/參觀。

《「肉」石俱焚》(浸大提供)

相關文章:【藝術無疆界】身體變家具 探索創意 雕塑無極限

今次展品包括雕塑、繪畫、數碼插畫同攝影等,題材包括對人類社會嘅反思、機器與血肉之軀嘅矛盾等。其中,畢業生曾寶怡以《「肉」石俱焚》為題作畫,畫中呈現一塊塊血紅嘅牛肉(圖),佢話想表達人類對肉食無止境嘅需求,砍伐大量樹木,而牛釋放大量溫室氣體,加劇氣候變化,若發生山火,火勢更猛烈,情况有如畫中嘅牛肉,喺鍋中「疼痛呼叫」。