全亞洲最大型結合 NFT 及元宇宙本地藝術戶外展覽「ARTAVERSE」 Dear Jane為ARTSTAGE打頭陣
由彩正娛樂、耀榮文化、大龍鳳亞洲主辦，Mastercard®冠名贊助，全亞洲最大型之一的戶外 NFT x 本地藝術展覽「ARTAVERSE」於 2022年 6月3 至12日於中環海濱活動空間盛大舉行。詳情如下：
展覽日期：2022 年 6 月 3 日 一 6 月 12 日
展覽時段：工作坊：10:00 – 12:00；早段：12:00 – 16:00；晚段：17:00 – 21:00
展覽地點：中環海濱活動空間
票價：$280-$480、VIP全日門票 $880 (詳情請參照售票網頁)
門票現已於KKTIX公開發售
售票網址：https://tix-get-go.kktix.cc/events/artaverse2022
首屆「ARTAVERSE」戶外展覽佔地逾 150,000平方呎，展覽結合多元數位藝術展覽、藝術科技交流分享，及音樂文化表演，當中三大重點藝術展區ART HUB、ART BOX 及 ART STAGE，除會展出合共逾 20 億港元的藝術收藏品外，同時亦設有虛擬實境（VR）與擴增實境（AR）等嶄新科技，讓大眾走進虛擬與現實交融的Web 3.0藝術宇宙，享受全新的藝術世界。
備受觸目的藝術舞台ARTSTAGE音樂及藝術表演亦是「ARTAVERSE」的其中一項焦點所在，大會特別安排現場音樂表演於一連兩週的週五及週末晚上舉行。
作為6月3日首場打頭陣的嘉賓，Dear Jane甫上台已令現場氣氛高漲。唱完頭兩首歌《最後一間唱片舖》及《脫骹的華爾茲》後，Jackal問現場觀眾有否到場內的藝術展區參觀？他說：「一陣完騷之後，有時間我哋都想去行下睇下。」之後鼓手Nice因坐椅問題需作出調整，Howie見狀鬼馬表示：「Nice係咪覺得自己條褲隻色唔啱，所以想即場換褲？」豈料台下fans竟高呼「想睇」，令Nice哭笑不得。
唱畢《未開始已經結束》後，Jackal指他們在台上只看到頭兩行fans的燈牌：「一係我哋配合大家，玩啲抒情小小嘅歌，你哋可唔可以着咗手機嘅燈，俾返個好靚嘅畫面我哋？」全場隨即出現一片燈海，令Howie亦不禁表示要拍下來紀念。期後Dear Jane一口氣唱出《銀河修理員》、《哪裡只得我共你》及《聖馬力諾之心》。雖然唱足七首歌，但現場觀眾仍然意猶未盡，不停高呼encore，見到樂迷頂着高溫不願離去，疼錫fans的Dear Jane最終上台多唱一首 《2084》作結尾，Tim並跟樂迷約定下一場演出再見。
騷後Dear Jane表示已有一段時間沒有演出戶外騷，雖然昨晚天氣酷熱，但見到觀眾如此熱情，令他們相當興奮，Nice更直言「唔夠喉」希望多唱幾首。提到Tim跟樂迷的約定，他透露Dear Jane正籌備演唱會：「八月會有一個crossover演出，而年尾就會有一個自己騷，暫時會想係戶外嘅，但詳情稍後再公布。」至於首次live獻唱《脫骹的華爾茲》，Tim表示估計不到觀眾反應會如此熱烈，令他大感意外。
6月11日第四場演出，由洪嘉豪及MC 張天賦擔任表現嘉賓。獻唱三首歌的洪嘉豪，首先自彈自唱出《24/7戀人》，他在台上表示：「一直好想做呢類型festival，多謝今晚ARTAVERSE請我嚟，希望再有機會做呢類型演出。」到演繹完《活人鏢靶》後，洪嘉豪指原本是晚想演唱較side track的《救》，但最終決定改唱樂迷較熟熟的《逆時車站》。
雖然自彈自唱了三首歌，但洪嘉豪直言並不夠喉，但無奈時間有限未能多唱幾首，他說：「大家都知我同MC有首合唱歌《聖誕很忙》，但係一直都未有機會唱畀大家聽。」在場fans聞言便不斷歡呼，但洪嘉豪卻笑說：「哎呀，覺得有啲對唔住大家，今晚大家都唔會聽到呢首歌嘅，但遲啲會有機會。今晚天雨路滑，大家小心地滑呀。」並介紹接力演出的MC張天賦出場。
唱出第一首歌《反對無效》後，MC在台上表示自己不僅是跟洪嘉豪水火不容，連跟在坐的觀眾亦是水火不容，他解釋說：「因為下晝咁大雨大家都喺度等，咁極端嘅天氣都等，所以大家對我哋嘅愛都係唔會溶㗎！」台下有fans聞言即大叫：「為咗你係值得㗎！」由於是晚全場爆滿，當中不少fans都站起來欣賞演出，MC為免最後排fans被擋着，故在台上呼籲：「大家盡可能坐低，燈牌都係唱完歌先舉，因為要顧及後排觀眾，唔想佢哋睇唔到。」照顧完fans後，MC再唱出《Boyfriend material》及《時候不早》，雖然已在台上演唱了三首歌，但他指自己心情仍相當緊張：「我頭先喺後台緊張到手震，其實我隻手而家都仲震緊。」他又感激樂迷一直支持自己，令他由餐廳的小舞台，走到今日這個戶外場地，並為眾人送上最後一首歌《記憶棉》。
完騷後洪嘉豪跟MC跟接受訪問，二人直言是晚並不夠喉，故表示他們9月將會再次合體舉行演唱，問到二人屆時會有甚麼特別演出？洪嘉豪表示：「我有華納舞王之稱，到時跳舞都可以嘅。」但問到會否跟MC在演唱會上鬥舞？洪嘉豪即笑說：「自己跳舞都未搞得掂，唔好鬥喇。」在旁的MC則透露六月底將會推出新歌：「另外我同嘉豪都會有首演唱會主題曲，就會喺八月中出嘅。」
6月12日尾場由許廷鏗為ARTAVERSE擔任壓軸表演嘉賓，並在台上唱出《煽風點火》、《無力感》及《佛系人生》三首歌，已有多時沒有公開演唱的他，更不斷於台上呼籲fans為他拍照，許廷鏗笑說：「我啲歌迷係咪好耐冇見過我？影我啦，tag我啦，可能有機會成為下一個NFT㗎。」
接受訪問時，許廷鏗直言喜愛戶外騷，還指希望香港有更多這類型的戶外場地空間：「嚟緊都會做show，戶外嘅場地都有興趣，但就唔會係呢個月。」會場內除了有音樂舞台外，還有不少NFT展品，許廷鏗透露自己亦開始有涉獵NFT，並謂有意將送給哥哥的結婚禮物，製作成NFT：「之前哥哥結婚嗰陣，我作咗首歌送畀佢，曲詞都係我嘅，首歌從來未發布過，我都諗過會唔會有一啲有能之士會有興趣，去將呢隻歌據為己有，我真係諗緊NFT有啲咩可能性。」
是次ARTAVERSE內的ART HUB展區，邀請了不少名人及藝術家作出展覽，當中許廷鏗亦有作品在內展出。提到現今不少藝術家會將自己的畫作製作成NFT，問到平日也會作畫的許廷鏗，可會考慮將其畫作製作成NFT？他表示：「都有興趣，因為我見到而家好多人，甚至係啲好細嘅小朋友，都會開始將佢哋嘅畫作變成NFT，同埋身邊啲朋友都有玩呢樣嘢，所以係幾特別。」
此外，C AllStar的King，昨日亦化身成DJ King在場打碟，不過有別於其他DJ，King選擇了energy不是太強勁的歌曲：「因為配合返陰天，所以揀啲歌係比較大家聽落舒舒服服嘅，所以都冇期望大家一定要跳起身去玩。」提到早前C AllStar跟MR的演出因疫情及檔期問題而告吹，King表示當下感覺猶如愚人節一般：「好多騷都因為咁而搞唔成，所以自己都要放返個正常心態去睇，一日未到真正演出，都唔好抱太大期望。」至於問到他何時推出新歌？King表示今年內會推出：「會諗吓係咪玩返啲Pop少少，大家容易接受啲嘅音樂。」
