生活煮意Power Up！王子教你煮3道升級版家常菜式 至適合不同場合
香港人生活忙碌，日常上班工作、照顧家庭已佔去大部份時間，入廚漸變困難。今次《王子煮場》就和大家分享三道精選菜式，由新鮮醬料為先的「秘製蔥蓉蒸東星斑」、10分鐘有得食的至快輕盈「Green Monday牛油果冷麵」，以及善用食材又上得廳堂、見得客人的「龍蝦湯爆爆飯」，適合不同場合之餘，亦為家常菜式注入新力量。王子亦將多款拿手好菜結集為書「王子的88道拿手菜」，為你帶來源源不斷的新煮意！
Presented by: WAW Creation
編輯：J Lee
升級版家常便飯 小家庭簡易惹味攻略
家常便飯不外乎三餸一湯，想為日常料理升級，醬料亦擔任重要角色。除了鑽研廚藝外，王子亦會製作自家薑蔥蓉、辣椒醬，趕時間快手蒸餸後加入，節省時間亦不減風味。週末想同家人食好啲？不妨跟王子學做蔥蓉蒸東星斑，有新鮮東星斑塊、配合王子秘製的足料蔥蓉、索汁一流的新鮮粉皮，香氣四溢但做法簡單、材料亦經濟實惠，至適合小家庭！
秘製蔥蓉蒸東星斑
材料：東星班、 新鮮粉皮、 王子秘製薑蓉、薑蔥蓉
步驟：
1：東星斑切塊後徹底沖水，用廚房紙巾印乾
2：加入生粉、鹽、胡椒粉、生油拌勻
3：加入秘製薑蔥蓉拌勻後， 醃30分鐘
4：準備粉皮鋪碟，放上東星斑蒸6分鐘後，灒上滾油
5：完成！
王子貼士：想更好味，可以將粉皮改為荷葉，香氣十足！買魚的時候，可以找魚販將原條東星斑切成斑塊，節省時間！
即睇完整食譜：【王子煮場】冬至食好餸：秘製蔥油蒸東星斑 x 獨家秘製薑蔥醬 簡單惹味至啱做冬
WFH有食神？10分鐘快靚正之選
經歷年多的疫情，大家都習慣了在家工作、學習的日子。但來到期待的午餐時段，想開火煮飯有食神，又要金睛火眼抓緊時間，會感到分身不暇。想快靚正又健康？不如跟王子學做 Green Monday 牛油果冷麵，5-10分鐘內有得食。節省時間之餘，亦能夠食到有營健康好味道！
Green Monday牛油果冷麵
材料：車厘茄、擔仔麵、牛油果、薄荷葉
醬料：奶、日本醬油、青芥末、黑椒粉、橄欖油、芝麻
步驟：
1：準備冷麵
2：車厘茄、牛油果對半切片。
3：將牛油果及其他調味料放入攪拌機打成醬
4：拌勻
王子貼士：
秉承惜食好習慣，大家可以用食剩的麵。亦可以快手煲水淥麵，放進冰水中降溫，保持爽脆口感。
選擇軟熟的牛油果，可以憑外皮、觸感、觀察頂蒂開始：深綠色頂蒂，身呈深綠色至紫棕色，用手按壓時會感到有彈性，就是一顆狀態完美的牛油果
即睇完整食譜：【王子煮場】Green Monday牛油果冷麵 5分鐘高速即食
驚喜靚料來襲！招呼朋友、請客必學菜式
親朋好友來訪，想令大家WOW出聲，上乘食材、廚藝功夫缺一不可！惜食又識食的王子利用蘊含滋味的龍蝦殼，加入脆炸爆米，創造出一味食落令人驚嘆的龍蝦湯爆爆飯。另外，王子亦從老字號海味世家「海生行」找來高質青邊鮑魚，配上松茸等煮成營養靚湯，令賓客眼前一亮！
香脆惹味 龍蝦湯爆爆飯
材料：
龍蝦湯：龍蝦殼、上湯、清水、草菇、帶子、唐芹、芫荽、薑蔥、胡椒粉
爆爆飯 ：生米、白飯
步驟：
1：滾油炸飯至脆米、滾油爆香薑片、龍蝦殼；加水、上湯，中大火煮45分鐘。
2：草菇汆水、帶子、芫荽、蔥切粒；加入生米煮泡飯。
3：加入帶子、芫荽、蔥粒稍煮；灑上唐芹、胡椒粉調味。
4﹕加入香口爆爆飯
王子貼士：
一貫王子珍惜食材的烹飪哲學，採用龍蝦殼熬湯，好味之餘亦不會浪費食材。
食炸脆米爆爆飯要睇時機？準備上碟的時候先倒入湯，保持香脆口感！
即睇完整食譜：【王子煮場】有聲！惜食系列 龍蝦湯爆爆飯 脆米配濃湯 輕脆惹味入口即爆
同場加映：青邊鮑魚松茸煲雞湯
材料
| 冰鮮澳洲野生青邊鮑魚 250g | 雞 一斤半/約900g |
| 豬展 400g | 金華火腿 50g |
| 花菇 40g | 松茸 25g |
| 蒽、薑片、米酒 適量 | 水 4至5L |
步驟：
1﹕煲滾水，等青邊鮑完全解凍；用牙刷、生粉刷走髒物
2﹕用薑蔥、米酒將雞、豬肉汆水
3：準備凍清水，依次序放入肉、浸菇水
4：滾起後放入青邊鮑、花菇松茸，滾15-20分鐘
5：細火煲3小時
王子貼士：
徹底浸腍花菇、松茸精華！保留浸菇水！
青邊鮑魚要完全解凍才開始煮，否則煮不出鮑魚的味道。
即睇完整食譜：【2021農曆新年：王子煮場 x 海生行 】賀年煮鮑魚／花膠／海參料理 巧用急凍海味 簡易煮出應節佳餚（多片多圖）
Author Bio：
食飲愛好者，放洋英國，食貫中西，從大學開始產生對美食的熱情，閒時喜愛穿梭大街小巷選購食材，並在窩居內親自下廚，烹飪手法簡潔俐落，絕無浪費。他的美食之旅，多彩又多姿。
gwz Fastidious and meticulous aiming for “Perfection at your palate”. Passionately homemade in Hong Kong.
